தேவையான கல்வித் தகுதி இல்லாதது மற்றும் நியாயமான நிபுணத்துவத்துடன் சிகிச்சை வழங்காதது மட்டுமே மருத்துவ அலட்சியமாகும் – உச்ச நீதிமன்றம்

மருத்துவ அலட்சியம் (medical negligence) குறித்து நுகர்வோர் நீதிமன்றங்களில் வழக்குகள் தாக்கல் செய்யப்படுகின்றன. இந்நிலையில், கடந்த வாரத்தில் (25 அக்டோபர் 2024) உச்ச நீதிமன்றம் வழங்கிய தீர்ப்பு ஒன்றில் “மருத்துவ அலட்சியம் என்பது என்ன?” என்று விளக்கப்பட்டுள்ளது.

கடந்த 1996 ஜூன் மாதத்தில், சண்டிகாரில் உள்ள மெடிக்கல் எஜுகேஷன் அண்ட் ரிசர்ச் இன்ஸ்டிட்யூட் மருத்துவமனையில் 6 வயது சிறுவனுக்கு இடது பக்க கண்ணில் ஏற்பட்டிருந்த தொங்கும் கண் இமை (congenital disorder) என்ற பிரச்சினைக்காக டாக்டர் நிராஜ் சூட் அறுவை சிகிச்சை செய்துள்ளார் இருப்பினும், அறுவைசிகிச்சைக்குப் பிறகு கண்ணின் நிலையில் பிரச்சனை சரியாகாமல் மோசமடைந்தது.

“தனது மகனின் கண்ணில் எவ்வித குறைபாடும் இல்லை என்றும் வலது கண்ணின் இமையுடன் ஒப்பிடும்போது இடது கண்ணின் இமை சிறிது தூக்கி இருந்தது என்றும் இந்த திருத்தத்தை (correction) சிறிய அறுவை சிகிச்சை மூலம் குணப்படுத்தி இருக்கலாம் என்றும் மருத்துவரின் தவறான செயல்முறையால் தமது மகனின் கண்ணின் நிலை மோசம் மோசம் அடைந்து விட்டது என்றும்” குற்றம் சாட்டி சிறுவனின் தந்தை மாநில நுகர்வோர் குறைதீர் ஆணையத்தில் மருத்துவர் மீதும் மருத்துவமனை மீதும் வழக்கு தாக்கல் செய்திருந்தார்.  இந்த வழக்கை கடந்த 2005 ஆம் ஆண்டு மாநில நுகர்வோர் ஆணையம் தள்ளுபடி செய்து விட்டது.

சிறுவனின் தந்தை மாநில நுகர்வோர் ஆணையம் வழங்கிய தீர்ப்பை எதிர்த்து தேசிய நுகர்வோர் ஆணையத்தில் மேல்முறையீடு செய்துள்ளார். நடந்த தவறுக்கு மருத்துவரும் மருத்துவமனையும் கூட்டாக பொறுப்பானவர்கள் என்றும் இதனால் பாதிக்கப்பட்டவருக்கு ரூ 3,00,000/- இழப்பீடும் சிகிச்சையில் அலட்சியமாக இருந்ததற்கு   ரூ 50,000/- இழப்பீடும் வழங்க வேண்டும் என்று தேசிய நுகர்வோர் ஆணையம் மேல்முறையீட்டில் தீர்ப்பு வழங்கியது.

தேசிய நுகர்வோர் ஆணையம் வழங்கிய தீர்ப்பை எதிர்த்து சம்பந்தப்பட்ட மருத்துவரும் மருத்துவமனையும் உச்ச நீதிமன்றத்தில் மேல்முறையீடு செய்தனர். இதனை விசாரித்த உச்ச நீதிமன்றம் கடந்த வாரத்தில்  மருத்துவர் மற்றும் மருத்துவமனை தாக்கல் செய்த மேல்முறையீட்டை ஏற்று தேசிய நுகர்வோர் ஆணையத்தின் தீர்ப்பை ரத்து செய்து தீர்ப்பு வழங்கியுள்ளது. 

இந்த தீர்ப்பில் உச்சநீதிமன்றம் கூறியுள்ள விவரங்கள் பின்வருமாறு. அறுவைச் சிகிச்சைக்குப் பின்னர் நோயாளியின் உடல்நிலை மோசமடைவது என்பது நோயாளிக்கு வழங்கப்பட்ட சிகிச்சையில் குறைபாடு அல்லது அலட்சியம் என்பதை குறிப்பதாகாது. ஒவ்வொரு அறுவை சிகிச்சையிலும் அல்லது அத்தகைய மருத்துவ சிகிச்சையிலும் அறுவை சிகிச்சைக்கு பின்னர் நோயாளியின் நிலை மேம்படும் அல்லது நோயாளியின் எதிர்பார்ப்புக்கு ஏற்ப சிகிச்சை வெற்றி பெறும் என எதிர்பார்க்க இயலாது. சில அரிதான சந்தர்ப்பங்களில் நோயாளியின் நிலை மேம்படாமலும் அறுவை சிகிச்சை வெற்றி பெறாமலும் போவதற்கான சாத்தியங்கள் உள்ளன.  இதனை மருத்துவ நிபுணரின் அலட்சியம் என்று முடிவு செய்ய இயலாது.

மருத்துவத் தொழிலில் உரிய கவனிப்பை கடைபிடிக்க தவறுதல் (failing exercise due care) கடமையை மீறுதல் (breach of duty) மற்றும் இவற்றின் காரணமாக ஏற்படும் சேதங்கள் (consequential damage) ஆகியவை மருத்துவ அலட்சியம் என முடிவு செய்யப்பட்டு நடவடிக்கை (actionable medical negligence) எடுக்க தக்கனவையாகும். மருத்துவத் தொழிலில் ஏற்றுக் கொள்ளக் கூடிய நடைமுறையை ஒரு மருத்துவர் பின்பற்றும்போது ஏற்படும் எளிய கவனிப்பின்மை (simple lack of care) முடிவு செய்வதில் ஏற்பட்ட பிழை (an error of judgment) அல்லது விபத்து (an accident) போன்றவை காரணமாக பிரச்சனை ஏற்படும் போது, அவற்றை மருத்துவ அலட்சியம் என்று கருத இயலாது.

ஒரு மருத்துவர் தேவையான கல்வித் தகுதி மற்றும் திறமை இல்லாமல் சிகிச்சை அளிப்பது (not possessed with the requisite qualification or skill) மருத்துவ அலட்சியமாகும். ஒரு மருத்துவர் தேவையான கல்வித் தகுதியையும் திறமையும் பெற்றிருந்த நிலையிலும் நியாயமான திறமையை பயன்படுத்த தவறினால் (fails to exercise reasonable skill) அத்தகைய செயலும் மருத்துவ அலட்சியமாகும்.

இந்த மேல்முறையீட்டு வழக்கில் வழக்கை தாக்கல் செய்தவர் தரப்பில் மருத்துவம் மற்றும் மருத்துவமனை மீதான குற்றச்சாட்டை நிரூபிக்க போதிய ஆதாரங்கள் இல்லை என்பதோடு அறுவை சிகிச்சை செய்த மருத்துவர் நியாயமான திறமையை பயன்படுத்த தவறிவிட்டார் என்பதும் நிரூபிக்கப்படவில்லை என்பதால் தேசிய நுகர்வோர் ஆணையம் இழப்பீடு வழங்க வேண்டும் என்ற உத்தரவு ரத்து செய்யப்படுகிறது என்று உச்ச நீதிமன்றத்தின் தீர்ப்பில் குறிப்பிடப்பட்டுள்ளது.